أيمن الجندى يكتب | مصر وأمريكا

أيمن الجندى يكتب | مصر وأمريكا

د.-أيمن-الجندى1

باللهجة العامية الساخرة، كتب لنا الدكتور عصام الخواجة، أستاذ الطب النفسى بجامعات أمريكا، هذه المقارنة الطريفة بين مصر وأمريكا بعد إقامته الطويلة هناك. تقول الرسالة:

«أكثر ما يعجبنى فى أمريكا:

1- مافيش بيه وباشا وسيادتك وسعادتك والأستاذ الدكتور. كله جيمس ومايكل وتيريزا.

2- الناس هنا ما بتتعازمش عند الدخول من الباب وتزق ضيفها علشان يدخل هو الأول، ويجرى ناحية الشمال علشان التانى يبقى على اليمين ويدخل هو الأول (مش عارف ليه العذاب ده كله).

3- تقدر تحط رجل على رجل أمام مديرك بدون مشاكل (الموضوع ده لا علاقة له بالاحترام هنا).

4- لا أحد يقول لك خلى عنك يا باشا ويشيل لك الشنطة. كل واحد بيشيل شنطته بنفسه هنا.

5- ما فيش بوس وأحضان بين الرجال. الموضوع ده مع الستات بس!!

6- ما حدش بيبصبص على الستات اللى ماشية فى الشارع حتى لو لابسة مينى جيب!

7- لو حد عزمك على الغدا حتشكره وتسيبه يدفع من غير ما تحلف بالطلاق إنه مش دافع وتعملوا خناقة عند الدفع.

8- ما فيش سلام باليد كل يوم الصبح فى الشغل. هو صباح الخير وبس.

9- الساعات والتليفونات والنضارات الشمس والأحذية الكلاركس بالذات مش مهمة قوى فى الحياة.

10- لو واحد جه اجتماع متأخر وما فيش كرسى حيفضل واقف أو يدور على كرسى مهما كان منصبه، وما حدش بيدى كرسيه لحد.

…………………….

من أكثر ما أكرهه فى أمريكا:

1- البيروقراطية والنظام الصارم الممل أحيانا والبروتوكولات التى لا يحيدون عنها فى كل شىء حتى بدون لازمة وبغباء أحيانا.

2- إنك تسوق عربيتك وراء سيدة سنها ٨٥ سنة ومش عارف تعديها. وتبقى مصيبة لو الحاجة لابسه برنيطة كبيرة فوق رأسها يبقى ليلتك سودة ومش حتروح فى يومك ومش حتعرف تزمر لها طبعا.

3- الطماطم والخيار أغلى من الموز والتفاح.

4 – الأمريكان كتير منهم أساتذة فى الكلام والإبهار الشكلى والعنطزة وساعات بيبقى من جواه أبيض يا ورد. والخمرة قطعاً بتأثر على المخ.

5- من وجهة نظر واحد مصرى طفح الكيل… نص الشعب الأمريكى متدلع ولولا المهاجرين ما كانتش أمريكا بقت أمريكا!

6- كمية الدعاية والضغوط علشان تشترى حاجات إنت مش عايزها وخصوصاً على الستات غير طبيعية! بيبيعوا لك الهوا.

7- تشقى وتتعب طول الشهر وتلاقى نص مرتبك رايح ضرائب.

8- لو حاجة باظت ترميها وتشترى حاجة جديدة لأن التصليح غالى جدا.

9- والمأساة الكبرى طبعاً إن مافيش شطافات فى الحمامات.

المصدر:المصرى اليوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *