لحظة ميلاد – شعر: مجدى عبد الرحيم

لحظة ميلاد – شعر: مجدى عبد الرحيم

[1] شهيق داخل
زفير طالع
ولقمتين متغمسين مرار
وملح عادم للحياه
مُش قادر يظبط الأحوال
وأحلام بتدحرج على أوجاع ..
بطعم الموت
وناس ماشيه بتتعكز
على أيام ..
مَاليها الخوف
وناس ع الشط مستنيه
لحظة ميلاد

[2] كان جدى ..
يحكى لى
ع الخديوى ..
والوالى ..
والإنجليز
وأجدادنا الطيبين الغلابة
اللى حفروا القناة
علمونا الصبر
وعشق الأرض
كما الموت و الحياه
لا يوم تفرَّط ..
و لا تنباع
كان جدى يفرك ف إيديه
حبات الرمل
تفوح ريحه زمان
تخضر عمرنا البور

[3] عصايتك انكسرت
وإيدك انجزعت
من كتر الضرب ..
ف جتتى ..
يا سعاده البيه
ف بلاش تزعل منى
سلامة إيديك المحروسه ..
من كل سوء

[4] كان ولا حاجه
اتمسكن ..
و اتلون ..
فتمكن
من كل حاجه
لكن ..
من عيون كتيره ..
سقط
وأصبح ولا حاجه
رغم إن معاه ..
كل حاجه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *