شظية / من الولد اللي من غير كف – شعر عامية – محمد فرغلي

جوه فصلي ..
كل واحد عدّ عمره ..
عدّ كفين إلا صابع
وحدي .. عدّيت دمعه .. دمعه لحد تسعه
عجزي : ان الدمع ينزل ممسحوش
واني احس بكف صاحبي ..
وكف إيدي ميلمسوش
لما باحضن بين شفايفي ريشة
و أرسم ..
كنت بارسم إيد فى وردة ،
كل شجرة : دراع و طارح بالصوابع ،
والسحابة : إيد بتشبك ألف إيد
أما أمي ..
لسه ريشة من جناحها بين شفايفي
لسه بتقول ان كفي جنب قلبي ..
زاد جماله فاختفي
ون مهما الدنيا تشتي ..
كفي وحده دون جميع الفصل حاسس بالدفا
علّمت فمي انه ينطق ..
وانه يرسم
ليه فى لحظة كل صورة رسمتهالها ..
فرّعت جناحين و طارت !!
أمي : كفى ..
والسما / علي حد علمي / محتاجتش فـ يوم لكف
والفراق ديما بيشتي ..
مهما مزن دموعنا جف
نفسي اشغبط ويا ريشتي / عالسما / ..
قد أشف جناح لأمي ،
أو ألاقي ملاك شاففني ..
بابكي بدل الدمع كف
نفسي كل كفوفكوا ترسم .. ماتحربش
يمكن أرسم صورة ليها  .. ماتهجرش
نفسي …
لكن
بعد آخر غارة ليكم ..
طرت ويّا صورة ليها
بجناحين و إيد و كف

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *