محمد فتحي يكتب | غرف الكلام المتين من حكمة السواقين

«تحدانى أحدهم أن أكتب لأسبوع كامل بعيداً عن السياسة وقرفها والمزايدات والاتهامات، وقد قبلت التحدى، وهذا هو اليوم السابع».

بعد النكسة لاحظ د. سيد عويس انتشار العبارات المكتوبة على السيارات، وفكر فى تحليلها؛ نظراً لما تحمله من عبقرية ووجهة نظر وفلسفة وعمق، ليس بغريب على المواطن المصرى البسيط، وهكذا خرجت الدراسة العبقرية «هتاف الصامتين»، التى صدرت قبل أعوام فى مكتبة الأسرة، ولو كان د. عويس حياً الآن لكان أعاد دراسته من جديد مع كتابات الحوائط التى أغرقت مصر بما فيها من إبداع، بعيداً عن السفالة والقبح اللذين زادا هذه الأيام، ليكتشف عظمة المصريين وجمالهم وفلسفتهم الشعبية التى تستطيع أن تتعلم منها وأنت تتأملها، كما لا بد أنه كان سيلاحظ تغيرات عديدة طرأت على العبارات المكتوبة على السيارات والتكاتك، تختلف عن عبارات «سنقاتل»، والدعوات للانتقام من العدو الإسرائيلى، كما تنتج لنا أمثالاً شعبية وعبارات فلسفية، أكثر بلاغة من تلك التى يكتبها العديد من المثقفين والنخب والكتاب والنشطاء على «فيس بوك» و«تويتر».

هذه جولة سريعة مع جمل رصدتها على عدد من سيارات النقل والتكاتك أدعوك لتتأملها وتفكر فيها جيداً:

* الرجولة.. مش بسهولة.

* ما تبصلهاش يا عبيط.. دى جاية بالتقسيط.

* بكرة القطة.. تبقى تويوتا.

* البطة المرتاحة للسفر والسياحة.

* ما تبحلقش يا لوح.. دى جاية بطلوع الروح.

* إن نام السبع شوية كلاب ياكلوه.

* زغزغها تضحك!!

* سولار فى التانك ولا مليون فى البنك.

* آخرة التقدير.. خسرت كتير.

* بطلنا اللى يعطلنا.

* إحنا سواقين القطش اللى ما بنغلطش.

* يا بنات.. كفاية اشتغالات.

* ما تجريش ورايا.. أختك مش معايا!!

* آخرة الشقاوة عيش وحلاوة.

* مطلوب آنسة للعمل!!

* صاحب صاحبك على عيبه، وما تصاحبش اللى فى جيبه.

* عبده صغير.. بس يحير.

* يا ناس يا مكبوتة هى دى الحدوتة.

* غير وما تحسدش.

* تخبطها تحكها.. هحطك تحتها.

* سكينة تدبحنى.. ولا بنت تجرحنى.

* حتى هدف حياتى طلع تسلل.

* ما تبصش يا حمار.. دى عليها تار.

* الدلع شياكة.. مش قلة أدب وتناكة.

* يا بخت اللى صاحبه راجل.

* دلعها فى الغيارات، وريحها ع المطبات.

* لو الأرزاق بالجرى ما كانش حد حصلنى.

* خليك ديب وبلاش تخيب.

* يحميكى من الميكانيكى.

* الكار ده مش كارنا بس ربنا يصبرنا.

* عشم مات.. المعاملة خد وهات.

* عبقرى فى زمن طرى.

* ما تبصش لعجلها لتجيب أجلها.

* عشت عصفورة.. دبحونى.

* الحلوة خوخة.. جت بعد دوخة.

* ما تقولش دى بكام دى جاية بدهب المدام.

* تركب أسليك.. تنزل أولع فيك.

* حلوة ومتلمعة وع السكة متشخلعة.

* عضة أسد ولا نظرة حسد.

* اللى يخاف م العفريت.. يعمل عبيط.

* من حق التقيل يتدلع.

* لو كان الجرى بالرتب كان زمانى لوا.

* خليك هادى.. ما بعرفش أدادى.

* هسيبك كده ورايا.. انت مش من مستوايا.

* عايز تعيش.. ما تعدينيش.

* لو باض الديك برضه مش هعديك.

* حبيتها وقعدنا نلوك لوك.. أتاريها طمعانة فى التوك توك.

* صاحبك اللى خانك زى دخانك.. بفلوسك تشتريه وبرجلك تطفيه.

(المصدر : جريدة الوطن )

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *