وفاضلك ايه؟ – شعر عامية – محمد طلبة رضوان

وفاضلك ايه
من لهفتك على يوم سعادة ما ينتهيش
من فرحتك
في العيد
وفي الأفراح
ومواسم اللمه
من أول بوسه
تساهي عيون الحراس
وتاخدها من نن عنيها
من أول مره تسافر
وتشوف الدنيا
بتجري على الجنبين
الشجر السارح
والعلامات البيضا على الأسفلت
عمدان النور
والناس
الواقفه بعيد
بتبص عليهم
ويبصوا عليك
وفاضلك إيه؟
الكل بيجري
وينساك
لحظة ما يشوفك
وزمانك نفسه
من غير ما يفكر
بيفوتك
وفاضلك إيه
من أول لمسة ايد
من أول مرة تاخدها في حضنك
من أول نظرة اعجاب
ومن التقدير المتكرر
الصادق والكداب
وفاضلك إيه؟

اترك تعليقاً

لن يتم نشر عنوان بريدك الإلكتروني.